प्रधानमन्त्री शेरबहादुर देउवा लाई हाँस्य कलाकार माग्ने बुढोको ९ बुंदे चिठ्ठी

सम्माननीय देउबा ज्यु, जय नेपाल ।

हजुरको हाल के छ ? यता सबै बेश बेस छ ।

फेरि मन्त्रीमंडल बिस्तार हुने कुराले मन हर्षित भएको छ । ५० त पहिल्यै थिए , अब थप्दा ६० जति हुने रहेछ , अति उत्तम हजुर । एक थरि मान्छे बिरोधमा उफ्रिन थालिसके , उफ्रिदैमा कोहि ठुलो हुँदैन,त्यसरी ठुलो हुने भए जंगलको सबभन्दा ठुलो जनावर बाँदर हुन्थ्यो हजुर । ६० जना मन्त्री हुँदाका फाइदाहरु के के छन् ? सकारात्मक कोणबाट केलाउन जान्न पर्यो नि होइन हजुर । उफ्रिनेहरु हो ! यहाँ पढ, के के छन् फाइदा ।

१ , हाम्रो देशमा मन्त्रि बस्ने टोलमा बाटो पिच हुने र बत्ती नजाने प्रचलन छ , अब कम्तिमा ६० वटा टोल बिकशित हुने छ ।

२ , अरु बेला जाम भए पनि मन्त्रीको सबारीको बेला ट्राफिक प्रहरीले बाटो खोलिदिने प्रचलन छ , अब ६० जना मन्त्रि भएपछी सबै चोकमा कोहिन कोहि मन्त्रि भेटिन्छन ,यसले जाम खोल्न ठुलो सहयोग मिल्छ ।

३ , ६० जना मन्त्रि भएपछी ६० वटा त महंगा गाडी चाहियो , ति गाडी बेच्नेले नाफा पाए , तिनको आर्थिक उन्नात्ति भयो । बर्षेनी बिकाशमा खर्च हुने कति रकम फ्रिज भैरहेको छ, त्यो रकम गाडी किनेर सदुपयोग भयो ।

४ , अहिले सम्म आफ्नो मान्छे मन्त्रि नहुदा कतिलाई बिरक्त लागेको थियो होला , अब हेर्नोस ,कसैका ज्वाई मन्त्रि भए , कसैका भिनाजु मन्त्रि भए ,कसैका दिदि मन्त्रि भए परिवारमा कस्तो खुशी छायो , अब दशैंमा ससुराली जाँदा टक्क झण्डा सहितको गाडी घर अगाडी लगेर रोकेर टिका लगाउदा कस्तो मज्जा हुन्छ । पहिले नमस्कार गर्न नि गाह्रो मान्ने ससुराले मोजा सहितको खुट्टामा ढोग्दा कति रमाईलो हुन्छ।

५ ,बर्षौ देखि राजनीति गर्दा पनि आफ्ना कार्यकर्तालाई गतिलो ठेक्का पार्न नपाउदा कति पिडा थियो , अब बल्ल पिडामा मल्हम लगाउन पाइने भएको छ ।

६ , भद्रकालीमा झण्डा बेच्ने पसल छ , ६० वटा झण्डा एकै चोटी बिक्दा , त्यसबाट आउने कर सरकारको ढुकुटीमा आउँछ र देशको आर्थिक उन्नति हुन्छ ।

७ , मन्त्रि हुँदा दौरा सुरुवाल कोट टोपी टल्किने जुत्ता लगाएतको सामग्रीको पनि बिक्रि बढ्दा देशलाई आर्थिक टेवा पुग्छ ।

८ , हुलमुलमा मन्त्रि बनाउदा टोले गुन्डाका आफन्त ,डनका आफन्त पनि मन्त्रि हुने सम्भाबना हुने हुँदा तिनले अब मन्त्रालयमै अखडा जमाउन पुग्दछन र टोलमा हुने दादागिरी कम भई शान्ति सुरक्ष्यामा योगदान पुग्ने छ ।

९ , मन्त्रीमंडल ठुलो बनाउंदा बिपक्षी दलको मनोबल कमजोर भइ कुर्सीमा बेला बेला जाने भुइचालो मत्थर हुन्छ ।

कुरो नबुझी उफ्रिनेलाई पुग्नेगरी भन्दिएं नि हजुर ।

अन्तमा : अशोज ११ गते आरजु म्याडमलाई पनि लिएर हलमा आइसेला ,संगै बसेर छक्का पन्जा हेरौंला हजुर ।

—–केदार प्रसाद घिमिरे (माग्ने बुडो ) ।मन परे शेयर गर्नुहोला ।